86
மரகதத்தின் அன்றைய நாளின் பேச்சிற்குப் பிறகு வைரவன் நிறையவே மாறியிருந்தார்.ஆபீஸ் முடிந்து வந்த பின்பு தன்னால் முடிந்த உதவிகளை செய்தவாறு மனைவியோடு தனக்கான நிமிடங்களை செலவு செய்தார்.
நிச்சயமாய் அவர் கொடுமைக்கார கணவன் என்றெல்லாம் இல்லை தான்.மிக மிக அன்பானவர் ,கோபமே படத் தெரியாதவர் தான்.ஆனால் மகள் என்றால் அத்தனை உயிர்.மகளுக்காக எந்த எல்லைக்கும் செல்வார்.மகளின் சொல்லே வேதவாக்கு.
அதே நேரம் அவர் வீட்டிற்கு ஒரே மகன் என்பதால் எந்த வேலையும் செய்து பழக்கமில்லை.திருமணத்திற்கு பிறகும் மரகதத்திற்கு உதவி செய்ய வேண்டும் என்றெல்லாம் எண்ணியதில்லை.சொல்ல போனால் கணவர்களின் வழக்கமான வாசகமான,
“உனக்கென்ன வீட்ல சும்மா தான இருக்க என்னை மாதிரி நாலு இடம் போய் வந்தா தெரியும்னு”,அசால்ட்டா தன்னுடைய கடுப்பை மனைவியிடத்தில் காட்டிவிடுவார் பல நேரங்களில்.
மரகதமும் அதை பெரிதாகவெல்லாம் எடுத்துக் கொள்ளமட்டார்.பதிலுக்கு பதில் கத்திவிட்டு அந்த நொடியே மறந்தும் விடுவார்.
ஆனால் தன் மனைவி மனதில் இருந்ததையெல்லாம் பேசி கேட்ட பிறகு வைரவனுக்கு ரொம்பவே வருத்தமாகிப் போனது.ஏதோ ஒரு விதத்தில் நிச்சயம் சிறந்த கணவனாக தான் இல்லை என எண்ண ஆரம்பித்திருந்தார்.
அதனாலேயே அவரோடு தனக்கான நேரத்தை அதிகப்படுத்திக் கொண்டார்.
“ஏன் டீ இதெல்லாம் ஒரு நாள் கூட என்கிட்ட சொன்னதில்ல?”
“இதெல்லாம் சொல்லிட்டு இருப்பாங்களா..இது எல்லா பொண்ணுக்கும் சாகுற வரை மனசுல இருக்குற விஷயங்கள் தான்.எத்தனை உறவு பொறுப்பு வந்தாலும் அம்மாவும் அப்பாவும் எப்பவும் வேற தான்.”
“ம்ம் ஆனாலும் மனசு கஷ்டமாவே இருக்கு இத்தனை வருஷம் உன்கூட வாழ்ந்து என்ன ப்ரோஜனம் உன்னைபத்தி யோசிக்காமயே இருந்துருக்கனே..”
“அடடடா இப்போ என்ன அதான் நானே பெருசா எடுத்துக்கலைனு சொல்லிட்டனே..அப்பறம் ஏன் நீங்க அதையே பிடிச்சு தொங்கிட்டு இருக்கீங்க..”,என ஒரு அதட்டலில் அந்த பேச்சை நிறுத்தினார்.
சமையலறையில் நடந்த இந்த சம்பாஷனைகளை கேட்டுக் கொண்டிருந்த மதுமிதாவின் முகத்தில் மெல்லிய சிரிப்பு தோன்றியது.
எதை எதையோ கண்டுபிடிக்கணும் தெரிஞ்சுக்கணும்னு ஓடுறோம்.ஒரு சாதாரண குடும்பதலைவியான நம்ம அம்மாவை பத்தி தெரியாமயே இருந்துருக்கோமே என்று தான் தோன்றியது அவளுக்கு.
மூவருமாய் சேர்ந்து இரவு உணவை முடித்துவிட்டு வைரவன் வழக்கமான தன் வேலையாய் காலார நடந்து வருவதாகக் கூறி கிளம்பிச் சென்றார்.
ஹாலில் அமர்ந்து டீவி பார்த்துக் கொண்டிருந்த தாயின்மடியில் வந்து படுத்துக் கொண்டாள் மதுமிதா.
“என்னடீ செல்லம் கொஞ்சல் அதிகமா இருக்கு என்ன விஷயம்?”
“என்ன மம்மி இப்படி சொல்லிட்ட நா செல்லம் கொஞ்சாம வேற யாரு கொஞ்சுவா சொல்லு..”
“ம்ம் சரி சரி விஷத்தை சொல்லு..”
“நீ கற்பூரம் மா..எப்படி கரெக்டா கண்டுபிடிச்ச?”
“ரொம்ப ஐஸ் வைக்காம விஷயத்தை சொல்லு..”
“உன்னோட இத்தனை வருஷ கல்யாண வாழ்க்கைல என்னைக்காவது எங்களுக்கு தெரியாம அழுதுருக்கியாமா?”
“ம்ம் நிறைய தடவை அழுதுருக்கேன் ஏன் கேக்குற?”
மதுமிதாவிற்கு தன் தாயிடம் பிடித்த மிகச் சிறந்த ஒரு குணம் அது எதை கேட்டாலும் ஒளிவு மறைவின்றி சட்டென நினைத்ததை கூறிவிடுவார்.
“எதை நினைச்சும்மா?”
“அப்படியெல்லாம் ஒண்ணும் சொல்லிட முடியாது மதும்மா..அது ஒரு மாதிரியான ஸ்ட்ரெஸ்..ஏன் எதுக்குனு சொல்ல முடியாத ஒரு விஷயம்.சம்மந்தமே இல்லாம கல்யாணமே பண்ணிருக்க வேணாமோ அப்பா அம்மாவோட குழந்தையாவே இருந்துருக்கலாமோனு தோணும்.அப்பறம் ஒரு தடவை அழுது தீர்த்துட்டா பாரம் கொஞ்சம் குறைஞ்ச மாதிரி இருக்கும்.மத்தபடி கஷ்டபடுறேன்..அப்பா கொடுமை படுத்துராருனு எல்லாம் கிடையாது.”
“ம்ம் பொதுவா ஒரு பொண்ணு புருஷன்கிட்ட எதிர்பார்க்குறது என்னம்மா?”
“அது ஒவ்வொருத்தரை பொறுத்து மாறும் மது..பொதுவான ஒரு விஷயம்னு பார்த்தா அன்பா பாத்துக்கணும் நமக்கான நேரத்தை ஒதுக்கணும் இதுதான்.என்னை கேட்டா எந்த எதிர்பார்ப்பும் இல்லாம இருக்குறது தான் நல்லதுனு சொல்லுவேன்.
வெள்ளை காகிதமா மனசை வச்சுக்கணும் நமக்கானவரின் குணங்களையும் பழக்க வழக்கத்தையும் அதில் எழுதிடணும் ..வாழ்க்கையில பாதி பிரச்சனை அப்போவே முடிஞ்சுரும்.”
“ஆனா இதெல்லாம் நடக்குற விஷயமா மா..சாதாரணமாவே ஆயிரம் எதிர்பார்ப்பு இருக்கும் பொண்ணுகளுக்கு அதுலயும் தனக்கு வரப் போற புருஷன் விஷயத்துல எப்படிமா எதிர்பார்க்காம இருக்க முடியும்.ஒரு பாட்டோ படமோ பார்த்தா கூட அந்த ஹீரோ மாதிரி நம்மை பாத்துக்கணும் கேர் பண்ணிக்கனும்னு நினைக்க மாட்டாங்களா?அவ்வளவு ஏன் நானே கூட அப்படி தான்..”
“ம்ம் நீ சொல்றது தான் எதார்த்தம் ஆனா அதையும் மீறிய பக்குவம் வரணும்..இப்போனு இல்ல எல்லா காலத்துலயுமே ஒரு சினிமாலயோ கதையிலயோ வர ஹீரோ மாதிரியான ஒருத்தர் தான் புருஷனா வரணும்னு நினைப்பாங்க..
ஆனா அப்படியே எல்லாருக்கும் நடக்குமா சொல்லு..ஆனா அந்த காலத்திலே பிடிக்காத வாழ்க்கையா இருந்தாலும் குழந்தைகளுக்காக அனுசரிச்சு போய்ட்டு இருந்தாங்க.ஆனா இப்போ அப்படியா பிடிக்காத மாமியார் கைப்பட்டா குத்தம் கால் பட்டா குத்தம்னு சொல்லுவாங்களே அந்த மாதிரி கணவன் மனைவிகுள்ள அதிருப்தி வந்துட்டா ஒருத்தர் பண்ற எல்லாமே இன்னொருத்தங்களுக்கு தப்பா தான் தெரியும்.
மனகசப்பு அதிகமாகும்..சண்டை வரும் நிம்மதி போகும் கடைசில விவாகரத்து தான் ஒரே முடிவுனு பிரிஞ்சு போய்ட்றாங்க.பொறுமையும் பக்குவமும் ரொம்பவே குறைஞ்சு போச்சு இந்த காலத்துல..”
“என்னம்மா இப்படியெல்லாம் சொல்லி பயமுறுத்துற?கல்யாணம்னா இவ்ளோ கஷ்டமா..”
“சின்ன குழந்தை மாதிரி பேசாத மதும்மா..ஏற்றம் இறக்கம் இருந்தா தான் வாழ்க்கை.24 வருஷமா அம்மா அப்பா தான் உலகம்னு இருந்துட்டு திடீர்னு புது குடும்பம் புது உறவுகள்னு வாழ்க்கையையே மாத்துறது என்ன சாதாரண விஷயமா சொல்லு..
எல்லாத்தையும் சமாளிச்சு குடும்பத்தை தூக்கி கொண்டு வர்றதுதான் நமக்கான கடமையே..கஷ்டம் தான் ஆனா முடியாத காரியம் இல்ல கண்டிப்பா..”
“என்னென்னவோ சொல்லற ஒண்ணும் புரியல..”
“ஆளு தான் வளர்ந்துருக்கியே தவிர ஒண்ணும் தெரில டீ உனக்கு..இப்போ உதாரணத்துக்கு சொல்றேன் படத்துல புதுசா கல்யாணம் ஆன ஜோடினா எப்படி காட்டுவாங்க?”
“ம்ம் ஹனிமூன் டூயட்னு அவங்களுக்கே அவங்களுக்கான நேரம் இதை தான்..”
“கரெக்ட் ஆன நிஜத்துல எல்லார் வாழ்க்கையும் அப்படி இருக்குமானு கேட்டா கண்டிப்பா கிடையாது தான்.இப்போ என்னையே எடுத்துக்கோ கல்யாணம் முடிஞ்சு மாமியார் மாமனார் பாட்டினு கூட்டு குடும்பத்துக்கு தான் வந்தேன்.அப்படி இருக்கும் போது உங்கப்பா எப்பவுமே என் பின்னாடியே சுத்திட்டு இருக்கணும்னு நினைக்க முடியுமா..இல்ல எப்போ பார்த்தாலும் வெளில கூட்டிட்டு போவாங்கனு சொல்ல முடியுமா..
ஒரு பொண்ணுக்கு கண்டிப்பா அதுகூட ஏமாற்றம் தான்.ஆனா அதையே பெரிய விஷயமாக்கி தனிக் குடித்தனம் போறளவு எடுத்துட்டு போக கூடாது..அப்பா வீட்டுக்கு ஒரே பையன் அப்படியிருக்க அவரை அவங்க குடும்பத்துல இருந்து பிரிச்சு பெரியவங்க மனசை கஷ்டபடுத்தனுமா சொல்லு..
எனக்கு நிஜமாவே மாமியார் கொடுமை மாமனார் கொடுமையெல்லாம் இல்ல அதே நேரம் அவங்க ஒண்ணு ஒண்ணுத்துக்கும் உங்க அப்பாவ தான் எதிர்பார்ப்பாங்க..என்னை எங்கேயாவது கூட்டிட்டு போறேன்னு சொன்னாருனு நா கிளம்ப தயாரான சில நேரத்துல அவங்க பாட்டிக்கு உடம்பு முடியாம போய்டும் ஹாஸ்பிட்டலுக்கு ஓடணும்.
இதெல்லாம் ஒருவிதத்துல நம்ம கடமை தான் மது..பெரியவங்களுக்கு நாம செய்றதுனால ஒருவிதத்துலயும் குறைஞ்சு போய்ட மாட்டோம்.இப்போ உனக்கே நாளைக்கு நாத்தனார் இருக்கா அவளுக்கு கல்யாணம் குழந்தைனு ஆயுசுக்கும் அண்ணணா உன் புருஷன் பண்ண வேண்டிய கடமைகள் நிறைய இருக்கும்.
அது எல்லாத்துக்கும் நீதான் பக்கபலமா இருக்கனும்.அன்பால எல்லாரையும் உன் கைக்குள்ள வச்சுகணுமே தவிர புருஷனை மட்டும் கைகுள்ள போட்டுக்கோனு எப்பவுமே நா சொல்ல மாட்டேன்.உனக்கு உன் புருஷன் மட்டும் போதும்னு நீ நினைக்கலாம் ஆனா உன் குழந்தைக்கு தாத்தா பாட்டி அத்தைனு அத்தனை உறவும் தேவை.
வாழ்க்கையை இந்த கோணத்துல யோசிச்சு பாரு தேவையான பக்குவம் நிறையவே வரும் உனக்கு..”
“ம்மா நீ சான்ஸே இல்ல எல்லா அம்மாவும் கல்யாணம் பண்ண போற பொண்ணுகிட்ட புருஷனை உன் கைக்குள்ள வச்சுக்கோ முந்தானைல முடிஞ்சுக்கோனு தான சொல்லுவாங்க நீ என்ன இப்படியெல்லாம் சொல்ற..”
“ம்ம் இன்னொன்னும் சொல்றேன் கல்யாணத்துக்கு அப்பறம் அம்மா பேச்சை வச்சு எந்த முடிவும் எடுக்காத..உதாரணமா இப்போ நாளைக்கு நா உன் மாமியாரை பத்தி எதாவது சொல்றேன்னு வை..அவங்களை பாத்தா ரொம்ப செலவாளி போல இருக்கு மதுனு சொல்றேன்னு வை..
அதுக்கப்பறம் உனக்கு உன்னையறியாமையே அவங்களை அந்த கண்ணோட்டத்துல தான் பார்க்க தோணும்.சின்ன விஷயமும் பூதாகரமா தெரியும்.நான் ஒரு அம்மாவா என் பொண்ணு வாழ்க்கைனு யோசிச்சு பேசுவேன்.ஆனா நீ அந்த குடும்பத்து மகளா எல்லாரையும் மனசுல வச்சு நடக்கணும் இரண்டுக்கும் நிறைய நிறைய வித்தியாசம் இருக்கு தான?”
“ம்மா அப்பா ரொம்ப லக்கி உன்னை மாதிரி ஒரு ஃவைப் கிடைச்சதுக்கு..”
“ம்ம் சத்தமா சொல்லிராத உங்கப்பா அவ்ளோ தான்..இதெல்லாம் அனுபவத்துல கத்துகிட்டது தான்.நானும் சின்ன சின்ன விஷயத்துக்கு எல்லாம் அல்பமா சண்டை போட்டவ தான்.இப்போ அதெல்லாம் நினைச்சா ரொம்ப கேவலமா இருக்கு ..ச்சீ இதுக்கு போயா இப்படி சண்டை போட்டோம்னு..
இந்தமாதிரி இன்னும் நிறைய இருக்கு மது கண்ணா..சொல்லி தெரியுறத விட அனுபவம் உனக்கு நிறைவே கத்துக் கொடுக்கும்..”
“என்ன தான் சொல்லு நீ ஒரு படிக்காத மேதை மா..”
“அடி கழுத யாரைப் பார்த்து படிக்காதவனு சொல்ற நானெல்லாம் பி எஸ் சி மேத்ஸ் கோல்ட் மெடலிஸ்ட் ஆக்கும்..”
“ம்மாமாமாமா என்னம்மா சொல்ற??!!!!”
“எதுக்கு டீ இப்போ இப்படி கத்துற?”
“நா கேட்டப்போ எல்லாம் டிகிரி டிகிரினு மட்டும் தான சொல்லிருக்க..”
“ஆமா என்ன படிச்சுருக்கனு கேட்டா டிகிரினு தான சொல்லனும்..பாஸா பெயிலானு நீ கேக்கல நானும் சொல்லல..”
“ஆனாலும் உனக்கு குசும்பு ஜாஸ்தி மா..நானெல்லாம் லட்சத்துல ஒண்ணா இன்ஜினியரிங் படிச்சுட்டு பர்ஸ்ட் க்ளாஸ் பாஸ் பண்ணதுக்கே சீஇஓ ரேஞ்ச்க்கு கனவு காணுறேன்.நீ கோல்ட் மெடலிஸ்ட்னு சொல்ற எப்படி வேலைக்கெல்லாம் போகாம இருக்க?”
“அது உனக்கு பிடிச்சுருக்கு இது எனக்கு பிடிச்சுருக்கு அவ்ளோ தான்.சொல்லப் போனா உன் ஆசையை விட இதுதான் ரொம்ப கஷ்டம்..முழு நேரமும் மனசும் மூளையும் நாலு சுவத்துக்குள்ள நடக்க வேண்டிய வேலைகளை பத்தி மட்டுமே நினைச்சுட்டு இருக்கனும்..”
“இன்னைக்கு நீ மொத்தமா எனக்கு புதுசா தெரியுறம்மா..”
“ஆமா ஆமா இன்னும் மூணு மாசத்துல நீயும் இந்த லிஸ்ட்ல வரப் போற இல்ல அதான் அப்படி தெரியுறேன்.விட்டா விடிய விடிய பேசுவ தள்ளு நா போய் பால் சூடு பண்றேன் அப்பா வர்ற நேரமாச்சு..”
மரகதம் எழுந்து சென்ற சில நொடிகளில் வைரவன் உள்ளே நுழைந்தார்.தந்தையை சந்தேகமாய் பார்த்தவளாய்,
“என்னப்பா அம்மா உள்ளே போன டைமிங்கும் நீங்க உள்ளே வந்த டைமிங்கும் இடிக்குதே..அப்போவே வந்துட்டீங்களா?”
“மதும்மா ஆனாலும் அநியாயத்துக்கு அப்பாவை இப்படி கண்டுபிடிக்க கூடாது..உன்னை பொண்ணு பாத்துட்டு போனதுக்கே உன் அம்மாவை பத்தி இவ்ளோ தெரிய வருது இன்னும் உன் கல்யாணத்துக்குள்ளஉங்கம்மாவை பத்தி ஒண்ணுமே தெரிஞ்சுக்கலனு நிலைமை மாறிடும் போல..”
“ம்ம் என்ன தான் நீங்க பெஸ்ட் அப்பாவா இருந்தாலும் கொஞ்சமே கொஞ்சம் பெஸ்ட் ஹஸ்பண்டா இல்லையோனு தோணுதுப்பா..”
“எனக்கே அதான் தோணுதுடா மது..அவ நம்மளபத்தி புரிஞ்சுகிட்டதில்ல நாம பாதிகூட புரிஞ்சுக்கல அவளை..”
“ம்ம் சரி விடுங்க இதுக்கு அப்பறம் அதெல்லாம் எப்படி சரி பண்றதுனு பார்க்கலாம்..ஃப்ரீயா விடுங்க பா..”
“அப்பறம் அடுத்த வாரத்துல ஒரு நாள் நிச்சயப் புடவை எடுக்கப் போறதா சம்மந்தி வீட்ல இருந்து போன் பண்ணாங்க மது..உனக்கு என்ன கலர் பிடிக்கும்னு கேட்டாங்க..மறுபடியும் காலைல போன் பண்ணி பேசுறேன்னு சொன்னாங்க..”
“ம்ம் சரிப்பா..அம்மாகிட்ட கேக்குறேன் எனக்கு புடவை பத்தியெல்லாம் ஐடியாவே இல்ல..”
அன்றைய பொழுது அப்படியாய் கரைய மறுநாள் வழக்கத்தை விட சீக்கிரமே எழுந்து கொண்டாள் மது.பல் துலக்கிவிட்டு சமையலறைக்குச் சென்றவள் சமையல் மேடையில் ஏறி அமர்ந்து தாய் கொடுத்த காபியை குடிக்கத் தொடங்கினாள்.
“என்ன டீ இவ்ளோ சீக்கிரம் எழுந்துட்ட..ஆபீஸ்க்கு சீக்கிரம் போணுமா?”
“நானே திருந்த நினைச்சாலும் விட மாட்டியே நா திருந்திட்டேன் மா இன்றிலிருந்து உனக்கு உதவி செய்யப் போகிறேன்..”
“ம்ம் இப்படி சொல்லிட்டு தான் ஒருத்தர் காய் வாங்க போறேன்னு மார்க்கெட்டுக்கு போய்ருக்காரு வந்தா தான் தெரியும் உதவியா இல்லையானு?”
“என்னது அப்பா எனக்கு முன்னாடியே எழுந்துட்டாறா?என்ன கொடுமை சரவணா!!!”
“ம்ம் இதெல்லாம் ஒரே ராத்திரில மாறப்போற விஷயம் கிடையாது அதனால ஒழுங்கா போய் உன் வேலையை பாரு..எனக்கு ஒரு உதவியும் பண்ண வேணாம் போ போய் குளி..அதுவே பெரிய உதவி தான்.”
“மிஸஸ் மரகதம் வர வர உங்கள் கொழுப்பு மிகவும் அதிகரித்துவிட்டது கவனித்துக் கொள்கிறேன்..”,என்றவாறே அவர் இடுப்பில் குறுகுறுப்பு மூட்டிவிட்டு ஓடினாள்.
“வந்தேன்னா கன்னம் பழுத்துரும் கழுதை..”,என பதிலுக்கு கத்தியவாறே சமையலை கவனித்தவருக்கு உதட்டில் புன்னகை அரும்பியது..
சற்று நேரத்தில் குளித்து தயாராகி வந்தவளுக்கு ஹாலில் சத்தம் அதிகமாகவே கேட்க தனதறையிலிருந்து வெளியே வந்தாள்.
“என்ன இங்க சத்தம் என்ன இங்க சத்தம்”,என கோவை சரளா பாணியில் கேட்க மரகதம் அவளை முறைத்தார்.
“ஏற்கனவே செம கோவத்துல இருக்கேன்..உங்கப்பாவ அடிக்க முடியாததையும் சேர்த்து நீ வாங்கி கட்டிட்டு போயிராத ஓரமா போ சொல்லிட்டேன்..”
“என்னப்பா பண்ணீங்க உங்கள் சதி இத்தனை கோபமாக இருக்கிறாரே?!”
“ஏன் டா மது அவளை இன்னும் காண்டாக்குற..நா ஒண்ணுமே பண்ணல டா அம்மாக்கு ஹெல்ப் பண்ணலாமேனு மார்கெட்க்கு போய் காய் வாங்கிட்டு வந்தேன்.அதுக்குப் போய் இப்படி திட்றா”
“ம்ம் வெறும் காய் இல்ல வண்டு விழுந்த அழுகிய தரமான காய்கறினு சொல்லுங்க..”
“அப்பா!!!!”
“நீயே பாரு டி உன் அருமை அப்பா வாங்கிட்டு வந்துருக்க அழகை..கத்திரிக்காய்ல அத்தனை சொத்தை..தக்காளி இரண்டு மூணு ஒரே அழுகல் வெண்டக்காய் ஒரே முத்தல்..”
“ம்மா ம்மா நிறுத்து பார்த்தாலே தெரியுது எல்லாத்தையும் சொல்லி நீ இன்னும் டென்ஷன் ஆகாத..அப்பா என்னப்பா இது..”
“மது டா நா என்ன பண்ணட்டும்..உங்கம்மா வழக்கமா வாங்குவேன்னு சொன்ன கடைக்குத் தான் போனேன்.அவன் தான் என்னை பார்த்தவுடனே வாங்க வாங்க சார் என்ன அக்கா வரலையா இன்னைக்கு குடுங்க நானே போட்டுத் தரேன் எல்லாத்தையும்னு போட்டு கொடுத்தான்.இப்படி ஆகும்னு எனக்கு என்ன தெரியும்..”
“ம்ம் அதை தானே நானும் சொல்றேன் உங்களுக்கு ஒண்ணும் தெரியாது அமைதியா உங்களுக்கு தெரிஞ்ச வேலையை மட்டும் பாருங்கனு..கேட்டாதான..இனி அப்பாவும் பொண்ணும் வந்து உதவி பண்றேன் அதுஇதுனு வந்தீங்கஅவ்ளோ தான் சொல்லிட்டேன்..
இருக்குற வேலை பத்தாதுனு இது வேற எனக்கு..யாராலையும் ஒரு உதவியும் கிடையாது..எல்லாம் நாம தான் பண்ணணும்..என்னத்த பண்றது நா வாங்கிட்டு வந்த வரம் அப்படி..”,என கத்தி புலம்பியவாறே சமையலறைக்குச் செல்ல அப்பாவும் மகளும் பாவமாய் முழித்தனர்.
“ஏன் டா மது யாரும் உதவி பண்ணலங்கிறா நா பண்ணிணதுல ஆயிரம் தப்பு சொல்றா உனக்கு எதாவது புரியுது?”
“ஹா ஹாஹா அப்பா எனக்கு தெரிஞ்சு இது எல்லா மனைவிகளின் பொதுவான குணம் போல..மே பி எதிர்காலத்துல நானும் இதில் அடக்கம்..புருஷனையும் குழந்தையையும் ஒரு வேலை செய்ய விடாம அக்கறையா பாத்துப்பாங்க.ஆனா கோவத்துல யாரும் ஒண்ணும் பண்றதில்லனு அவங்களையே திட்டவும் திட்டுவாங்க போல..”என்றவள் சத்தமாகவே சிரித்தாள்.
“இன்னும் அங்க என்ன வெட்டிகதை பேசிட்டு இருக்கீங்க இரண்டு பேருக்கும் ஆபீஸ் போற ஐடியா இருக்கா இல்லையா..”
“இதோ நா ஓடிட்டேன்..அப்பா தான்ம்மா கிளம்பாம பேசிட்டே இருக்காரு”,என அவள் பங்குக்கு வைரவனை கோர்த்துவிட்டு ஓடிவிட்டாள்.
Have any thoughts?
Share your reaction or leave a quick response — we’d love to hear what you think!
1 comment
Super💕